Волковысский педколледж

Сустрэча з фальклорам

31 студзеня навучэнцы груп 1-11 і 4-31 наведалі інтэрнат Ваўкавыскага каледжа. Наведалі не проста так, а дзеля знаёмства з новым цікавым чалавекам, творчым, нераўнадушным да фальклору, да народных песень і абрадаў. Гэтым чалавекам сёння была Надзея Аляксееўна Талашка – кіраўнік калектыву “Чараўніцы”.
Навучэнцы з задавальненнем слухалі пра гісторыю стварэння калектыву, пра яго дасягненні, удзельнікаў, рэпертуар. Мы даведаліся, што гурт быў створаны ў сакавіку 1972 года, а ў снежні 2004 года атрымаў званне народнага, у 2019 годзе стаў лаўрэатам І ступені ў рэгіянальным свяце “Пеўчае поле” (г. Пружаны), быў узнагароджаны дыпломам “За адраджэнне, развіццё і папулярызацыю традыцыйнай культуры Гродзеншчыны”. Надзея Аляксееўна адзначыла, што натуральнае вясковае асяроддзе з’яўляецца трывалым падмуркам для існавання і падтрымкі мясцовых песенных традыцый. Акрамя гэтага, прысутныя атрымалі сапраўдную асалоду ад беларускіх народных песень у выкананні Надзеі Аляксееўны, адбыўся прагляд фрагмента тэлеперадачы "Наперад у мінулае", дзе калектыў інсцэніраваў вясельны абрад з адметнымі Ваўкавыскімі традыцыямі. Думаецца, што невыпадкова гурт мае такую назву – “Чараўніцы”. Таму што збіранне і выкананне з такой любоўю, цеплынёй, адданасцю народных песень - і ёсць сапраўдная магія, чараўніцтва.
Хочацца выказаць падзяку загадчыку інтэрната Ваўкавыскага каледжа – Ліліі Іосіфаўне Рашчэўскай за арганізацыю сустрэчы, за запрашэнне на мерапрыемства. Сённяшні ўрок фальклору аказаўся плённым і карысным для маладога пакалення.
Куратар групы 1-11, Макавецкая К.З.
Здымкі прадстаўлены аўтарам

Апублікавана 31 студзеня 2023 г.

Перейти в архив всех новостей