Волковысский педколледж

Другі этап ХV міжнароднай моладзевай навукова-практычнай канферэнцыі

28 красавіка на базе гімназіі № 174 г.Мінска адбыўся другі этап ХV міжнароднай моладзевай навукова-практычнай канферэнцыі “Вялікая Айчынная вайна 1941-1945 гадоў у гістарычнай памяці народа”. Канферэнцыя праходзіла ў онлайн рэжыме. У якасці пераможцы першага этапу ў ёй удзельнічала навучэнка 6-21 групы спецыяльнасці “Турызм і гасціннасць” Анастасія Круглая. Даследчая работа навучэнкі называлася “Каб толькі не было вайны”. У ёй Анастасія расказала пра лёс сваёй прабабулі Марыі Адамаўны Ушчэнчык.

Марыя Адамаўна нарадзілася ў 1925 г. і ўсё жыццё пражыла ў вёсцы Леснікі Лідскага раёна. У вёсцы Леснікі да вайны быў 121 двор, жыло 497 чалавек. 6 жніўня 1942 года гэтая вёска стала сястрой Хатыні: нямецкія карнікі спалілі 100 двароў, забілі альбо спалілі 81 чалавек, з іх сем сем’яў поўнасцю і 18 дзяцей. Марыі ўдалося пазбегнуць смерці, але кулямётам была прастрэлена рука. Праз некаторы час пачалося яе загнаенне. Як гэта ні парадаксальна, але выжыць Марыі Адамаўне дапамог нямецкі ўрач, які ампутаваў руку, каб папярэдзіць гангрэну. У час вайны дзяўчына была сувязной партызанскага атраду. За мужнасць Марыя Адамаўна Ушчэнчык была ўзнагароджана ордэнам Айчыннай вайны I ступені, шматлікімі медалямі і граматамі. Нягледзячы на інваліднасць, жанчына пражыла доўгае і шчаслівае жыццё, нарадзіла пяцёра дзяцей, гадавала ўнукаў. Ужо пасля вайны да Марыі Адамаўны прыязджала дэлегацыя з Германіі. У яе цікавіліся, ці не трымае яна крыўды на нямецкі народ. Але Марыя Адамаўна заўсёды гаварыла, што не трэба блытаць фашыстаў і нямецкі народ – гэта розныя рэчы! Сапраўды: адзін немец яе ледзь не забіў, другі – уратаваў…

Анастасія вельмі ганарыцца сваёй прабабуляй і ўшаноўвае свае дзіцячыя ўспаміны аб ёй. А яшчэ Анастасія паведала, што ўзнагароды яе бабулі знаходзяцца ў музеі г.Астравец, дзе навучэнка плануе працаваць экскурсаводам пасля заканчэння каледжа.

Міжнародная канферэнцыі – першы вопыт удзелу Анастасіі ў такога роду мерапрыемствах. Журы конкурса найвышэйшымі баламі адзначыла ўнікальнасць і арыгінальнасць работы навучэнкі. Застаецца пажадаць Анастасіі далейшых поспехаў у даследчай працы!

А.У.Жывіца, выкладчык

Опубликовано 30 апреля 2022 г.